افغانستان کی موجودہ صورت حال: وحیدالرحمن خان کی دو نثری نظمیں

تکرار
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
امریکہ کے آخری فوجی نے
کابل ائیر پورٹ پر
ہوائی جہاز میں
بیٹھنے سے پہلے
تقریباً وہی بات کہی
جو روس کے آخری فوجی نے
دریائے آمو کے کنارے
ٹینک میں سے سر نکال کر
کہی تھی ؛
روس کے آخری فوجی نے
تقریباً وہی بات کہی
جو محراب گل نے
پہاڑ پر پرچم لہراتے ہوئے
کہی تھی:
افغان باقی، کہسار باقی!!

اسباب شکست / شکست اسباب

تم نے یہ جنگ ہارنی ہی تھی
کیوں کہ
تمہارے سینوں پر
بلٹ پروف جیکٹیں تھیں
اور ہمارے سینوں میں
دھڑکتے ہوئے دل!
تمہارے پاس ہزاروں بم تھے
اور ہمارے گھروں میں
پھول سے بچے،
جو بموں کو
کھلونا سمجھ کر کھیلتے ہیں،
تمہاری کلائیوں پر
گھڑیاں بندھی تھیں
اور ہمارے دامن سے وقت !
سو،تم نے یہ جنگ ہارنی ہی تھی