منصفوں کی جیب میں، آخریہ کیا محفوظ ہے؟ خالد عرفان

منصفوں کی جیب میں، آخریہ کیا محفوظ ہے؟
کوئی حلوہ ہے کہ نذرِفاتحہ محفوظ ہے؟

اک ”پنامہ“ معرکہ در معرکہ محفوظ ہے
اور ہر مجرم بہ قدرِ حوصلہ محفوظ ہے

 فیصلہ محفوظ کرنا بھی ہے اچھا فیصلہ
مجرموں کے بھاگنے کا راستہ محفوظ ہے

ایک رشتے دار نے لندن سے لکھا ہے، انہیں
تم چلے آؤ یہاں بیت الخلاء محفوظ ہے

مل گئی ہے اب کے پورے گھر کی گارنٹی انہیں
حد تو یہ ہے ان کی چوتھی اہلیہ محفوظ ہے

منصفوں نے سر پہ اب اوڑھے ہوئے ہیں ہیلمٹ
اس کا مطلب ہے کہ پوری عدلیہ محفوظ ہے

ملک سے خارج ہی رہتا ہے، ہمیشہ کی طرح
اس لئے اپنا ”وزیرِ خارجہ“ محفوظ ہے

اس طرح تالے میں رکھتے ہیں وہ اپنا فیصلہ
جیسے غبارے میں مصنوعی ہوا محفوظ ہے

فیس بک پر لکھ رہے ہیں لوگ، یہ ملتان میں
ہم کہاں محفوظ ہیں ؟ یوسف رضا محفوظ ہے۔

کیا کہوں اس ملک کی ترتیب ِحُسنِ انتظام
فیصلہ محفوظ ہے اور قوم ”نامحفوظ“ ہے