قدیم معاشروں میں کھیتی باڑی صرف بقا کا ذریعہ نہیں تھی بلکہ ایک مقدس سرگرمی بھی سمجھی جاتی تھی۔ زمین جوتنے کے عمل کو اکثر عبادت یا دیوتاؤں کی تعظیم کی ایک شکل کے طور پر دیکھا جاتا تھا کیونکہ اس میں فطرت کے ساتھ ہم آہنگی پیدا ہوتی ہے۔ زمین کاشت کرکے، لوگ اپنے خیال میں ان دیوتاؤں کی تعظیم کررہے ہوتے تھے جن کے بارے میں خیال کیا جاتا تھا کہ وہ خوشحالی کے لیے ضروری اسباب فراہم کرتے ہیں، جیسے کہ بارش اور سورج کی روشنی۔
یہی وجہ ہے کہ لاطینی زبان میں colere اور cultus کے لفظ بیک وقت کھیتی باڑی، عبادت، عقیدت اور دیکھ بھال کرنے یا خیال رکھنے کے لیے استعمال ہوتے تھے۔ ان میں سے colere فعل ہے اور cultus اسم۔
چونکہ کھیتی باڑی میں زمین کا خیال رکھا جاتا ہے لہذا خیال رکھنا عمومی معنی میں بھی cultus اور colere کے معنوں میں شامل ہوگیا۔ ان تین چارمختلف سرگرمیوں یعنی کھیتی باڑی، عبادت، عقیدت اور خیال رکھنے کے لیے ایک ہی لفظ استعمال کیا گیا کیونکہ ان سب سرگرمیوں کو ظاہر و باطن میں توازن اور ہم آہنگی برقرار رکھنے کے ضروری طریقوں کے طور پر دیکھا جاتا تھا۔
ان لفظوں سے جدید انگریزی میں جو مشہور لفظ آئے ہیں ان میں cultivation، culture اور cult شامل ہیں۔ لفظ cultivation کا مطلب کاشت کاری ہے۔
لفظ culture کا تعلق کھیتی باڑی سے بھی ہے کیونکہ انسان کی متمدن زندگی کی بنیاد کھیتی باڑی ہی بنی تھی جبکہ cultus/ colere میں زمین کا خیال رکھنے کی نسبت سے خیال رکھنے کے جو عمومی معنی آگئے ہیں، وہ بھی لفظ culture کی بنیاد سمجھتے جاتے ہیں۔
لفظ cult کا تعلق cultus بمعنی عبادت اور عقیدت سے ہے۔ cultus عبادت کرنا، انتہائی تعظیم کرنا، بہت عقیدت رکھنا جبکہ cult ایسا کوئی گروہ جو مخصوص دیوتا، شخص یا چیز کی عبادت کرتا ہو یا انتہائی تعظیم کرتا ہو یا بہت عقیدت رکھتا ہو۔
پہلے زمانے میں اس کا معنی منفی نہیں سمجھا جاتا تھا۔ عقیدہ اور عقیدت رکھنے والے کسی بھی گروہ کو کلٹ کہا جاتا تھا۔ اس کے معنی ایسے ہی تھے جیسے حلقہِ ارادت کے ہیں۔ مختلف مسیحی اولیاء کے پکے مرید خود کو خود ہی کلٹ کہتے تھے۔ عقیدے کے معنی میں بھی یہ لفظ مثبت معنی میں استعمال ہوتا تھا۔ انقلابِ فرانس کے بعد مذہب کے مخالف عقل پرست انقلابیوں نے خود اپنے متبادل ملحدانہ مذہب کا نام ”کلٹ اوف ریزن“ یعنی عقل کا کلٹ رکھا۔
اس لفظ کو منفی معنی کلیسا نے دینے شروع کیے تھے۔ کلیسا نے مرکزی دھارے کے عقائد اور تنظیم یعنی اپنی orthodoxy سے ہٹ کر نت نئے، اچھوتے اور "عجیب” عقائد پیش کرنے والی "heretic” قسم کی شخصیات کے حلقہ ہائے اثر کو کلٹس کا نام دینا شروع کیا اور ان کی مذمت شروع کردی۔ اس معنی میں کلٹ ایسے کسی گروہ کے لیے استعمال ہونے لگا جس کے عقائد "مرکزی دھارے” اور اکثریت سے مختلف ہوں اور وہ گروہ اپنے ان اچھوتے عقائد میں بہت یونیک ہو۔
کلیسا کی اینٹی کلٹ ازم کے بعد سیکولر اینٹی کلٹ ازم آئی جس نے کلیسا سے اس لفظ کو لیا اور تمام روایتی مذاہب کو کلٹ کا نام دے کر ان کی مخالفت شروع کی۔ مذہب بیزار افراد کے نزدیک مسیحیت کلٹ اوف جیزز ؑ ہے، بدھ مت کلٹ اوف بدھا ہے جبکہ اسلام کلٹ اوف محمد (ص) ہے، وغیرہ۔ کمیونسٹ ملکوں میں سب مذاہب کو کلٹ کہا جاتا اور ان کے خلاف پروپیگنڈا میں یہی لفظ استعمال کیا جاتا تھا۔ ”کلٹ“ یعنی مذہب سے وابستہ ہونا جرم تک تصور کیا جاتا۔ چین اور شمالی کوریا جیسے ملکوں میں اب بھی کم و بیش یہی صورتحال ہے۔
یوں آہستہ آہستہ کلٹ ایک منفی لفظ تو بن گیا، حالانکہ لفظ culture اور cultivation جو اصل کے اعتبار سے اس کے سگے بھائی ہیں، کوئی منفی معنی نہیں رکھتے لیکن لفظ "کلٹ” کے اب کوئی معروضی یا متفقہ معنی نہیں رہے۔ آج بھی اس کی متعدد تعریفیں ملتی ہیں جو ایک دوسرے سے خاصی مختلف ہیں۔ مختلف علوم مثلاً سماجیات، نفسیات، دینیات، سیاسیات و لسانیات کے ماہرین اس پر بحث کرتے رہتے ہیں۔
چونکہ اس لفظ اب کے کوئی باقاعدہ اور مسلمہ معنی نہیں رہے لہذا یہ معروضی طور پراستعمال نہیں ہوسکتی بلکہ ذاتی پسند نا پسند کی بنیاد پر اس کا استعمال ہوتا ہے۔ یہی وجہ ہے آج علمی دنیا میں اس لفظ کے استعمال کو ناپسند کیا جاتا ہے۔ سنجیدہ اور objective قسم کے اکیڈیمکس اسے نہ مذہبی معنوں میں استعمال کرتے ہیں اور نہ ہی سیاسی و سماجی معنوں میں۔ اسے پروپیگنڈا ٹرم یا slur سمجھا جاتا ہے۔ مہذب ملکوں کے سنجیدہ دانشور بھی اس کا استعمال سطحی اور کلیشے سمجھ کر نہیں کرتے جبکہ ہمارے ہاں جن لوگوں کو اس کا معنی ٹھیک سے پتہ بھی نہیں ہے، وہ بھی دلائل اور پذیرائی سے اپنی محرومی کو اس لفظ کا اپنے تئیں بطور "پڑھی لکھی” گالی استعمال کرکے چھپانے کی کوشش کرتے ہیں، خاص طور پہ سیاسی تنقید کے ضمن میں۔
