میرے علامہ اقبال:ایک بچے کا خراج — محمد احتشام الحق

0

(اقبال کے عاشق ایک گیارہ سالہ بچے کی تحریر جو ڈی پی ایس اسکول لاہور میں جماعت پنجم کا طالب علم ہے)

مجھے علامہ اقبال سے بہت محبت ہے۔ میں نے ان کی ایک تصویر اپنے کمرے میں لگا رکھی ہے جو میں نے کتابوں کی ایک نمائش سے خریدی تھی جب میں اپنے والد صاحب اعجازالحق اعجاز کے ساتھ گیا تھا۔ اس نمائش میں میرے والد نے مجھے علامہ اقبال پر بہت سی کتابیں لے کر دی تھیں۔ علامہ اقبال سے مجھے محبت اپنے دادا ابو محمد سلیم ساقی اور دادی اماں اور اپنے والد کی وجہ سے ہوئی اور میری اردو کی مس نے بھی مجھے ان کے بارے میں بہت سی اچھی اچھی باتیں بتائی ہیں۔

میرے والد تو اکثر علامہ اقبال پر کام میں ڈوبے رہتے ہیں اور ساتھ ساتھ مجھے اور میرے بھائیوں زین ، جہانزیب اور چھوٹی بہن مریم کو بھی علامہ اقبال کی شاعری اور ان کی زندگی کے بارے میں بتاتے رہتے ہیں۔ میں اپنے والد کے ساتھ علامہ اقبال کے پوتے منیب اقبال صاحب سے بھی مل چکا ہوں۔ وہ ہمارے گھر بھی آچکے ہیں اور ہم سے بہت پیار کرتے ہیں اور اچھی اچھی باتیں بتاتے ہیں۔ ان کا سگار پینے کا انداز بہت اچھا ہے اور وہ ڈریس بھی بہت اچھا پہنتے ہیں اور کسی کو بور نہیں ہونے دیتے۔ انھوں نے مجھے علامہ اقبال پہ کتابیں بھی گفٹ کی ہیں جن کو میں پڑھتا رہتا ہوں۔

مجھے علامہ اقبال کی نظم ماں کا خواب بہت اچھی لگتی ہے اور مجھے یہ نظم زبانی یاد ہے اور میں یہ نظم گا بھی سکتا ہوں۔ مجھے علامہ اقبال کے بہت سے شعر ابھی مشکل لگتے ہیں اور مجھے ان کا مطلب پوری طرح سے سمجھ نہیں آتا۔ جو سمجھ نہیں آتا میں اپنے والد اور اپنی مس سے پوچھ لیتا ہوں۔ میرا دل کرتا ہے کہ میں فارسی بھی سیکھوں کیوں کہ علامہ اقبال کی زیادہ کتابیں فارسی میں ہیں۔ علامہ اقبال دوسرے شاعروں کی طرح نہیں لگتے۔ وہ الگ الگ سے ہیں۔ وہ عام شاعر نہیں۔ میرا دل کرتا ہے کہ ان کے بارے میں زیادہ سے زیادہ سیکھوں۔ والد صاحب نے ان پر جو کتابیں لکھی ہیں وہ مجھے زیادہ سمجھ تو نہیں آتیں مگر میں پھر بھی ان کو پڑھنے کی کوشش کرتا ہوں۔ والد صاحب کہتے ہیں کہ جب تم بڑے ہو جاو گے تو خود ہی سمجھ جاو گے۔ ان سے جو لوگ ملنے آتے ہیں وہ بھی علامہ اقبال کی باتیں کرتے رہتے ہیں اور والد صاحب ہمیں بھی پاس بٹھا لیتے ہیں اور کہتے ہیں ان کی باتیں غور سے سنو۔ مجھے علامہ اقبال کے شعر پڑھنا بہت اچھا لگتا ہے۔

مجھے ان کی کتاب بانگ درا بہت پسند ہے اور اس میں بچوں کی نظمیں بہت اچھی لگتی ہیں۔ میں اپنے کلاس فیلوز سے بھی ان کے بارے میں باتیں کرتا ہوں۔ میں نے کتاب میں پڑھا کہ علامہ اقبال ہندوستان کے مسلمانوں میں آزادی کی روح پیدا کرتے تھے۔ پھر وہ آزادی کی روح کو سمجھنے لگے۔ یہ علامہ اقبال کی وجہ سے تھا کیوں کہ وہ آزادی کو بہت پسند کرتے تھے۔ علامہ اقبال نے کچھ عرصہ وکالت کی لیکن ان کا اصل جنوں شاعری تھا۔ مگر وہ پاکستان بننے سے پہلے ہی وفات پاگئے۔ میں کافی دفعہ ان کے مزار پہ بھی جا چکا ہوں اور ان کے لیے دعا کر چکا ہوں کہ اللہ ان کو جنت میں جگہ دے اور ان کے خوابوں کو پورا کرے۔

(Visited 1 times, 1 visits today)

Leave a Reply

Leave A Reply

%d bloggers like this: